語文.書話
2021-1-29
二〇二一年二月號
二○二○大疫情與二○二○大格局(歐陽偉豪)

舊年二○二○年尾,我同導演陳恩碩(Tom)又有搞作,查實,正確係佢老人家作咗首歌,我只係客串唱翻兩句啫。《二○二○》呢首歌喺YouTube播放一個星期,瀏覽人次已經超過兩萬。向各位介紹呢首歌,原因有二:

首先,首歌講翻二○二○年喺疫情影響下,我哋係點樣生活,呢啲材料引起我哋嘅共鳴同集體回憶。歌詞可以分十一段,有晒起承轉合:段一至八係起承,講疫情對生活嘅影響,從社會層面到家庭個人層面;段九係轉,講有病就要醫;段十至十一係合,最後帶出疫情好轉。

《二○二○》(作曲、填詞:陳恩碩)

一、年頭我諗住環遊世界 去奧地利逛街 去意大利買鞋 一眨眼全年就過晒 要我總括只可以講聲「唉」 嘥晒(韻腳:aai)

二、文娛到康樂全部摺晒 老細盡力撐住 細嘅日日去捱 點諗過世界變得咁快 所有計劃重新洗牌 冇埋(韻腳:aai)

三、食嘢得兩位 餐具要洗 三個又冇位 晚巿靜過鬼 啲積蓄就見底(韻腳:ai)

四、有得出街邊一個想留喺屋企 帶住個罩噏足半日仲有臭味 只不過我驚我唔爭氣 中咗招分分鐘嚇死(韻腳:ei)

五、每兩分鐘搓一次手皮都起皺 怕就怕我不羈過頭傳染老豆 點樣噴我都嫌唔足夠 唯抗疫令我緊張到累透(韻腳:au)

六、夜晚咳兩聲 我又會驚 諗下係咪有friend 似係有病 啲陰影大過天(韻腳:eng)

七、每次出街都好怕想唔返屋企 潔淨每套衫褲臭襪仲要抹地 只不過我驚你唔爭氣 中咗招分分鐘嚇死(韻腳:ei)

八、聖誕梗想開P去玩狂歡一晚 約盡老友親戚去我度食過節飯 只因我兩三人唔多慣 唯有限聚放寬先再約食晏(韻腳:aan)

九、麻麻煩煩 做事又慢 循循環環 冇次過關 測到有事 即刻走去醫 世界會好返(韻腳:aan)

十、各位今年辛苦晒收爐早啲唞 繼續抗戰終於有日會望見盡頭 個疫情靠堅守嚟爭鬥 巿道再差都統統會走(韻腳:au)

十一、總會有一朝起身見到零宗確診 冇病冇痛街邊店內布滿路人 餐廳戲院開返晒唔使等 唔怕病毒嘅香港有覺好瞓(韻腳:an)

呢首歌嘅主題係社會性,寫香港、鼓勵香港人,呢個大格局點樣用廣東話填詞?又點樣用廣東話體現呢個大格局?係呢篇文章重點所在。押韻方面,每段嘅韻腳都表明喺段末,順序例子有:

aai(如段一有:界、街、鞋);ai(如段三有:位、洗、鬼);ei(如段四有:企、味、氣);au(如段五有:皺、豆、夠);eng(如段六有:聲、驚、病);aan(如段八有:晚、飯、慣);an(如段十一有:診、人、瞓)。

資料顯示十一段歌詞用咗七個唔同嘅韻腳,即係超過一半嘅段落用唔同韻腳,增加語音上嘅變化,可以算係一種大格局。

因為首歌係總結二○二○年疫情嘅集體回憶,係全香港人(甚至全世界)嘅事,需要用好多表達「所有」意思嘅詞語,例如:段二呢兩句「老細盡力撐住 細嘅日日去捱」,「盡力」、「日日」就係表示所有或者極多嘅詞語。至於,廣東話嘅詞語,仲有冇表達所有、極多嘅意思呢?請睇:「晒」字,例子有:

「全年就過晒」、「嘥晒」(段一)

「文娛到康樂全部摺晒」(段二)

「各位今年辛苦晒」(段十)

「開返晒」(段十一)

「晒」嘅意思解全部、所有,例如:「全年就過晒」(段一),意思係全年嘅每一日;「開返晒」(段十一),意思係每間、全部餐廳都開咗。喺唔同段落用咗「晒」字,令到所有、全部嘅意思都滲入成首歌,從語法、語意上令到首歌有個大格局嘅感覺。總結,用廣東話填詞寫歌,都可以寫大時代、大格局。