語文.書話
2021-5-28
二〇二一年六月號
吾同你講笑(歐陽偉豪)

早排同心理學家劉英健博士傾開幽默呢個課題,我上網搵下資料,點知嚇咗我一跳,然後得啖笑,因為我竟然搵翻「吾同你講笑」呢個系列!(詳細內容可參考文章最尾網址)。

呢個系列係我分析自己喺一次演講度引起觀眾發笑嘅原理同技巧。嗰次演講唔係棟篤笑,而係為高中生講解一啲語言學溝通嘅原則,之不過當中某啲例子引起觀眾嘅笑聲,於是我就把心一橫,喺每個顯著嘅笑位之後,加個簡單嘅字詞分析,當時我仲喺中大教書,有幸邀請到電腦中心嘅同事一齊錄製,最後就出版咗呢個「吾同你講笑」嘅系列。下面我列舉幾個例子同大家分享一下。

一、小巴司機

話說有次搭小巴,乘客問司機有冇位,司機望下後面話有,乘客行去後面再行翻上去話冇,司機慨歎一句話佢背脊後面嗰個位。

笑位:「後面」嘅理解。

後面嘅正常解釋係後排座位,司機扭曲常理,將後面理解成背脊後面嘅第一排座位,由最後排變成第一排,形成歧義落差。

話說另一個乘客上車問有冇位,小巴司機話冇,乘客落車,司機反駁落去話佢落咗車咪有位囉。

笑位:司機嘅座位。

乘客問司機有冇座位,按常理係司機位以外嘅座位,而家司機扭曲常理,將自己個座位計算入內。

二、雞髀雞翼麵

話說有個老師見到飯堂餐牌寫住「雞髀雞翼麵$12.5」,覺得好抵食,於是同阿姐要一碗雞髀雞翼麵,飯堂阿姐話係雞髀菇雞翼麵,老師好尷尬就話咁得意有個菇字,阿姐反駁話翻老師仲得意讀漏個菇字。

笑位:有趣嘅「菇」。

按常理叫嘢食講錯好正常,冇咩咁好笑;但老師將個責任推落個餐牌度,話個寫法多咗個菇字,而飯堂阿姐不甘示弱,將個責任推翻落老師身上。如是者,夥計顧客互相反駁,將個責任推嚟推去。

三、警察盤問

話說有個疑犯接受警察盤問,警察問佢住邊,佢話九龍;跟住講者就問觀眾:「警察跟住點講?」觀眾就話:「九龍你住晒呀?」講者就取笑觀眾咁熟悉係咪成日畀人盤問。

笑位:經常畀人盤問。

其實,警察盤問疑犯「你住邊、你住晒」呢個互動已經由來已久,冇咩好笑;但正正係人人都好熟,觀眾講咗個警察駁斥嘅講法,點知講者同觀眾即場互動,揶揄觀眾咁熟悉係咪成日畀人盤問,呢個先係笑位嘅重點。

上面區區三個例子,已經帶出三個搞笑嘅原理或者技巧,就係:字詞歧義、扭曲常理、即場互動。字詞歧義即係有兩個意思,觀眾多數有第一個意思,而你解做第二個意思,中間有個落差,就較容易發笑;如果呢個落差係你故意去營造出嚟,特登去扭曲常理,亦都較易令人發笑;最後,你又即場同觀眾互動,取笑下觀眾,觀眾冇諗到你會揶揄佢,或者恥笑佢,扭曲咗觀眾嘅諗法,產生落差,亦係搞笑嘅一個方法。

「吾同你講笑」系列有十四個例子,當中嘅搞笑技巧係咪都係嚟自上面三種,定係仲有多啲呢?我真係唔同你講笑,你一定要睇下一期喇。

「吾同你講笑」系列網址:

https://podcasts.apple.com/us/podcast/%E5%90%BE%E5%90%8C%E4%BD%A0%E8%AC%9B%E7%AC%91/id514532475