呢兩組字究竟係咩單位呢？我哋將佢哋延長咁睇吓。

「食極都唔肥」：延長為「佢食極都唔肥」、「佢食極佢都唔肥」。

「郁親就聽打」：延長為「你郁親就聽打」、「你郁親就聽畀爸爸打」。

每句由左到右原來都可以補翻啲人物名詞，例如：佢、你、爸爸，咁就好明顯係句子，唔係詞組。

跟住就要問：係個咩類型嘅句子？究竟係單句定複句？

如果將後面嘅部分唔要，淨係得前半句，結果係句子唔能夠成立，例如：

「食極都唔肥。」（「食極」）

「郁親就聽打。」（「郁親」 ）

咁樣好大可能顯示呢兩句係複句，因為其他複句如果刪除後半句，淨翻前半句都係唔成立，例如：

「雖然佢好肥，但係身手敏捷。」（「雖然佢好肥」 ）

「因為有錢，所以買樓。」（「因為有錢」 ）

所以，咁樣更加證明「食極都唔肥」、「郁親就聽打」係複句，唔係單句。

雖然「食極都唔肥」、「郁親就聽打」都係複句，但見唔到類似「雖然、但係」、「因為、所以」呢啲連接詞，而係用動詞後綴「食極」個「極」同「郁親」個「親」，好似動詞有條尾巴咁，所以亦都可以叫做「動詞詞尾」。

「食極都唔肥」、「郁親就聽打」呢兩個複句，除咗有動詞後綴，其實仲有個條件，就係後面有另一個特定嘅字嚟同前半句結合；如果換咗另外一個字，個句子就錯，例如：

「食極都唔肥。」（「食極就唔肥。」 ）

「郁親就聽打。」（「郁親都聽打。」 ）

上面嘅結果顯示出：將後綴「都」、「就」調轉嚟用，即係「極／就」、「親／都」，句子就唔合語法。所以合語法嘅「極都配」、「親就配」形成一個特定嘅複句框架，學術上叫「框式結構」。

確立咗呢個框架，我哋就睇下點解「極」配「都」，「親」配「就」。

先睇「食極都唔肥」，「食極」意思係無論點樣食法，即係食法一嘅結果唔肥、食法二嘅結果唔肥、食法三嘅結果唔肥，如此類推。全部食法都指向同一個唔肥嘅結果，顯示一個全稱嘅意思，所以就用「都」嚟表達，因為「都」係有一個全稱嘅作用，例如：「每個／所有蘋果都好好食。」「每個」、「所有」係全稱詞組，所以後面用「都」。

跟住睇「郁親就聽打」，「郁親」配個「就」字，因為「郁親」意思係你一郁，你嘅結果係被打，成個句子係條件句，所以後面配個「就」字，同平時嘅條件句一樣，例如：「一落雨就要閂窗。」「如果落雨就要閂窗。」

以動詞後綴作為框式複句，除咗標題嗰兩句之外，仲有冇其他呢？下期再講。