語文.書話
2021-8-27
二〇二一年九月號
拆解幽默(歐陽偉豪)

最近,同補習天王林溢欣搞咗個《補習擂台》,佢請我同參賽者講解下點樣拆解幽默。我覺得好有意思,雖然佢話講十分鐘,但我都整咗個簡報出嚟,認真到好有幽默感。

幽默係一種創作,當中係有計算、有鋪排。

首先,攞黃子華最經典嘅「搵食啫,犯法呀」做例子熱下身。請睇:

甲:阿婆你都呃?(起)

乙:搵食啫。(承)

甲:你阿媽嚟。(轉)

乙:犯法呀?(合)

為方便討論,就用「起承轉合」分別代表上面四句。好笑位係「起」、「轉」所形成嘅落差。先睇「起」,正常嚟講阿婆應該指其他婆婆,而唔係「轉」所講嘅自己阿媽。所以當我哋話要有「較大嘅落差」,其實就係同正常或者預設嚟比較。換句話嚟講,我哋要刻意扭曲「起」、「轉」嘅關係,咁個笑話先有機會好笑。

我哋試下利用子華嘅框架,創作一下自己嘅笑話。假設用學校做題材:

  例子一      例子二

起 唔好成日口花花啦。唔好成日口花花啦。

承 搵食啫。     搵食啫。

轉 班長嚟㗎。    校長嚟㗎。

合 犯法呀?     犯法呀?

假設「起」嘅主題係學生口花花,正常預期係口花花撩女同學,所以「轉」應該用咩人物先可以有較大嘅落差,繼而產生好笑嘅效果?例子一嘅「轉」用班長,合乎預期,所以冇落差,唔好笑;但例子二嘅「轉」用校長,學校最權威嘅人士,正常環境下冇人敢挑戰佢,而家挑戰校長,唔符合預期,產生搞笑嘅反差效果。所以,「起」如果唔變,「轉」就要選取一個同預期落差較大嘅情境,搞笑效果先會更大。

相反,如果「轉」維持不變,「起」要點樣先可以搞笑啲呢?睇睇下表:

  例子三      例子四

起 唔好成日口花花啦。唔好成日裝裙底啦。

承 搵食啫。     搵食啫。

轉 校長嚟㗎。    校長嚟㗎。

合 犯法呀?     犯法呀?

學校係一個講規矩嘅地方,越唔規矩嘅事,受罰嘅程度就越重。喺例子四之下,唔規矩嘅行為變成「裝裙底」,受罰自然重過例子三嘅「口花花」,所以連埋「轉」一齊解,例子四嘅「裝校長裙底」,嚴重過例子三嘅「對校長口花花」。可見,「轉」如果唔變,「起」就要選取一個較特別、嚴重嘅情境,搞笑效果先較大。

如果「起」、「轉」都可以變,兩者嘅落差要擴展到最大,搞笑嘅效果就會最大,例如:

  例子五      例子六

起 唔好成日口花花啦。唔好成日裝裙底啦。

承 搵食啫。     搵食啫。

轉 班長嚟㗎。    校長嚟㗎。

合 犯法呀?     犯法呀?

喺例子六,「起」用較嚴重嘅「裝裙底」,「轉」用較權威嘅「校長」,兩者落差比例子五嘅「起」、「轉」大得多,大大提高搞笑嘅命中率。

要拆解幽默搞笑嘅語言,其中一個秘訣就係要突破預期,擴大同預期嘅落差;將整個笑話細分為:起、承、轉、合,就能夠清晰咁微調當中嘅細節。