一、知道有咩觀眾，先至定咩內容：

無綫嘅觀眾層面大部分都係五十歲以上，所以內容唔能夠太偏激，同時又要配合「人生課堂」呢個大主題，要輸出正能量，激勵人心，觀眾要學到嘢。

二、講自己嘅故仔，亦要適用於人哋：

內容當然要講自己嘅故仔，咁先嚟得感動。悲壯慘情、賺人熱淚可以感動；勵志激昂、啟迪心靈又可以好感動。自問冇咩慘情嘢可以分享，而我從教師跳入娛樂圈嘅經歷，反而可以滿足觀眾獵奇嘅心態，又可以令佢哋學到嘢，於是演講題目就定為：「跳出舒適圈」。

跟住就要諗下我從教師變做藝人，當中嘅風險管理點樣令到觀眾都可以用得到。請睇：

即使我跳出嚟拍戲搵得多唔過做講師嘅人工，只要我用短啲時間，五年吖，搵翻同一舊錢，我都有賺喎，時間就係金錢嘛。再講吖，我哋又冇細路，最大鑊咪供樓，我老婆有份工加嘛，成張氣墊咁，跌唔死，輸唔晒。

我將搵錢多少定輸贏嘅準則，變成搵錢以速度定輸贏。就算觀眾冇我跳出舒適圈嘅經歷，都可以學到定輸贏嘅唔同風險管理方式。之後，我仲用一個金句總結上面嘅要點：「跌唔死，輸唔晒」，令觀眾印象深刻。

觀眾好可能一邊聽我叫佢哋跳出舒適圈，一邊就會挑戰我需唔需要跳去其他電視台，於是我就咁樣回應佢哋嘅心底話：

我跳咗出嚟唔覺唔覺都成五年，喺同一個台五年喇，吖，又係時候諗下需唔需要又要跳出comfort zone。

我跳完又跳，主要嘅目的就係令觀眾思考跳出舒適圈唔係單次事件，而係不斷要探索嘅問題，問題背後其實就係老生常談嘅不斷突破、不斷進步。

要令到觀眾學得到、用得到，就要帶領佢哋去思考跳出舒適圈原來係滿足我哋嘅終極需要，即實現自我。我咁講：

實現自我，有個學名，叫Bensirlization，今次跳出嚟我要自己寫劇本，自己做男一。係呀，今次跌得死㗎，可以輸清光㗎，「社會名人，因實現自我，冚嘭唥嘅家產冇晒，傾家蕩產」。冇錯，我呢啲離地嘢，Bensirlization唔關你事，但你哋有自己嘅實現自我，Susan，你有Susanlization，吳生，你有吳生-lization……人人都有個實現自我-lization。

實現自我嚟自Self-actualization，呢個叫法好離地，於是我創作咗Bensirlization，但同觀眾仍然有段距離，我繼而再虛構一啲觀眾嘅名字套入去-lization入面，令到觀眾覺得我同佢哋都有實現自我嘅共同目標。

演講四大法則，我上面講咗兩個：

一、觀眾：知道有咩觀眾，先至定咩內容。

二、內容：講自己嘅故仔，亦要適用於人哋。

其餘兩個：語言、風格，下回分解。