語文.書話
2022-6-30
二〇二二年七月號
演講四大法則(下)

上回講到我喺無綫《360秒人生課堂》嘅演講「跳出舒適圈」,分析過涉及觀眾同內容嘅兩大法則,今回講埋餘下嘅法則:風格、語言技巧。

第三法則:嘗試新風格,你都冇我辦法。

為咗配合題目「跳出舒適圈」,我嘅私心就要跳出舒適圈,去試新嘅演講風格,即使效果唔好,你都冇我辦法。喺舞台上面演講,我做過兩場talk show,輕鬆搞笑誇張嘅演繹;做過無綫好多年前嘅《霎時感動》,雖然對住鏡頭錄影,但個節目都係對住觀眾講故仔,風格係情深斯文感動。類似「跳出舒適圈」嘅題目,譬如:轉型、改變、把握機會等等,都喺保險公司活動講過好幾次,風格係認真中帶幽默。最後,我決定用舞台劇嘅獨腳戲作為今次嘅風格,因為我未試過。

第四法則:語言風格唔配合,就會變得好垃圾。

要喺六分鐘內做到舞台劇獨腳戲嘅效果,語言語調表情動作就要誇張,加深觀眾對內容嘅印象,提高觀眾嘅情緒。所以,開段就用個「賤」字嚟刺激觀眾嘅神經,請睇:

你有冇發現叫人跳出comfort zone嘅人,係冇跳過出去㗎?佢哋喺度食花生睇住你去死,好鬼賤㗎。不過,世界上有人賤,就有人犯賤。早幾年,電視台叫我上去講解粗口,賤囉;但係我又上去講喎,犯賤囉;跟住我就由大學跳出嚟做娛樂圈,超級犯賤。

一段用上六個「賤」字,而最後三個仲係層層遞進:「賤」、「犯賤」、「超級犯賤」。「賤」,用嚟鬧人,除咗吸引眼球,背後仲扣住跳出舒適圈嘅心理狀態,即係好哋哋有份工,之後就唔要份工,呢種自己攞嚟賤,廣東話就用「犯賤」嚟描述。

由呢個「犯賤」,我哋睇到其實「犯賤」同「賤」形成一個對比,放大個比較或者相反嘅效果,下面講到做講師搵錢慢,拍廣告搵錢快,請睇:

我舊時教咗三十年書,喺個薪級表一級一級爬上去,慢吞吞,根本患咗搵錢性冷感,而家拍廣告,搵快錢,充滿快感。

我用嘅對比係「冷感─快感」,將搵錢嘅快慢轉變成性冷感同性快感嘅對比,其實都係用咗小學中文堂學過嘅比喻法。

我始終係個語言學家,要適當地玩下拆字,如果唔係就播唔到出街,請睇:

社會名人,因實現自我,冚嘭唥嘅家產冇晒,傾家蕩產。

將「冚家產」拆解成「冚嘭唥嘅家產」。

身體語言方面,為咗表達我由好淡定,到如夢初醒嘅錯愕,我就用除低眼鏡,用領呔抹眼鏡一連串動作嚟襯托,請睇:

我拍完第一個廣告問廣告妹妹(除眼鏡抹眼鏡):Ben Sir咁嘅氣勢會紅幾耐?阿妹話九……(呢個時候抬頭望向觀眾)……個月(即刻狼狽戴翻眼鏡,如夢初醒)。

要做到舞台劇獨腳戲嘅效果,當然要唱翻兩句歌,最後就唱出甄妮《奮鬥》幾句歌詞嚟勉勵觀眾,請睇:

咁希望第日有機會喺呢條實現自我-lization嘅道路上面,「同你披荊斬棘,為你衝破前途路障,獻出千般愛心與癡情,一切都奉上」。

總結演講四大法則:

一、於觀眾:知道有咩觀眾,先至定咩內容。

二、於內容:講自己嘅故仔,亦要適用於人哋。

三、於風格:嘗試新風格,你都冇我辦法。

四、於語言技巧:語言風格唔配合,就會變得好垃圾。

 

(作者為藝人、香港中文大學中國語言及文學系前高級講師。)