佢大大話話都係個博士。

今期我哋要真真實實同老老實實咁討論下「假假哋」同「大大話話」。

語感上，假假哋、大大話話兩句都係指出佢真係個博士，唔係假，冇講大話。問題係：點解用假、大話呢啲負面嘅字詞表示一個真嘅事實？請睇：

佢假假哋都係個博士。

咀嚼一下，會發現假假哋係指假極，或假到盡，即：

假極都係個博士。（＝假假哋都係個博士。）

假到盡都係個博士。（＝假假哋都係個博士。）

假設有個程度表，十分為滿分，當中假仁假義、假話假嘢、假到極點、假到盡頭，當中假嘅程度佔九分，而淨翻嘅一分就係指真嘢，即係個博士身份係真。暫且我哋叫呢個解釋做「九分假一分真」理論。

正因為九分呢個假嘅程度相當高，差唔多滿分，所以句子可以用連接詞「無論」嚟補充呢個高程度嘅假，即係：

無論點樣假，無論假到點樣，無論假到乜嘢程度，淨翻一丁點兒係真，就係博士嘅身份係真。

重睇：佢大大話話都係個博士。

我哋可以用連接詞「無論」套入去上面嘅句子，例如：

佢無論講咗幾多大話，有一點始終係真，就係個博士身份係真嘅。

意思冇變，即係大大話話可以用連接詞「無論」嚟表示。

同理，用「九分假一分真」嘅理論亦都可以解釋到大大話話嘅用法，即係九分嘅程度係講大話，淨翻一分嘅程度係真話，即佢真係個博士。

普通話冇假假哋，冇大大話話嘅講法，只能用連接詞「無論」嚟表達類似嘅意思，即：

他無論講了多少個大話，說了多少遍假話，有一點是真的，就是他是個博士。

綜合假假哋、大大話話嘅用法，用粵語表達有兩個方法：假假哋、大大話話同連接詞「無論」；而普通話就只有一個連接詞「無論」嘅講法。

點解唯獨是粵語可以有假假哋、大大話話嘅講法，而普通話冇，咁就要留待日後研究。

至於另一個講法：佢話晒都係個博士。

意思可以用連接詞「無論」凸顯出嚟：

無論你話佢乜都好，話佢點樣衰，點樣假，點樣講大話，佢話晒都係個博士。

所以，即使話晒表面上比較中性，唔似得假假哋、大大話話係負面嘅詞語，但話晒所包含嘅意思都係負面。

我哋繼續用「九分假一分真」嘅理論嚟解釋。因為九分假涵蓋負面嘢、衰嘢，所以話晒就指呢九分嘅負面嘢，而淨翻嘅一分就係真嘢，即：佢係個博士係真嘅。

總結一下呢三句意思相等嘅句子：

佢假假哋都係個博士。

佢大大話話都係個博士。

佢話晒都係個博士。

全部都可以用連接詞「無論」嚟改寫，同埋可以用「九分假一分真」嘅理論嚟解釋。

順帶一提，既然十分之一為真，含真度咁少，所以可以用正面或中性嘅字詞，例如：至少，嚟針對呢一分真，即：

佢至少都係個博士。

我相信呢篇文章假假哋都可以解釋到假假哋嘅用法。

（作者為藝人、香港中文大學中國語言及文學系前高級講師。）