語文.書話
2022-11-29
二〇二二年十二月號
Ben Sir與青蛙王子

今年九月同香港青年交響樂團有個合作,叫《Ben Sir的童話交響:青蛙王子》,場地係香港大會堂。呢個合作既易且難:容易,係我同樂團唔需要夾好多嘢,佢哋奏完一個樂章,我就講一段青蛙王子嘅故事;困難,就難在我要講故事。 

監製同我講:「啲小朋友唔識聽啲古典音樂架,佢哋嚟就係睇你,你加啲個人色彩,講吓中文,同佢哋有啲互動,咁就得架喇,我哋畀埋稿你。」我一睇份稿,大鑊,真係照住嚟講,家長同細路唔係瞓着就係走人,於是我要改頭換面,仲要加啲廣東話元素。

出人意表 增加想像

因為小朋友多數係幼稚園,最多係小學一、二年級,佢哋雖然細個,但唔係傻,兼喺手機嘅薰陶下,一個簡單嘅童話式開頭:「從前有個國王」,絕對吸引唔到佢哋同佢哋嘅父母,於是我就咁樣開頭:「各位,大家今日點解會睇到青蛙王子嘅故事,唔係Ben sir,亦唔係香港青年交響樂團,而係奇異博士喺大會堂呢度劃咗個圈,即係咁,(Ben sir手畫一圈,進入後戴起青蛙帽),將青蛙王子帶入嚟香港呢個元宇宙。原本係:有個國家嘅國王,而家變咗太平山頂有個國王,為咗王子可以認識對面海獅子山嘅公主,國王舉辦咗一場嘉年華會。」

粵語互動元素:靜靜雞同靜雞雞

冇粵語互動:青蛙要搵到真愛,笑死人咩?於是青蛙跳落去維多利亞港,游去獅子山搵真愛。

有粵語互動:青蛙要搵到真愛,笑死人咩?於是青蛙靜靜雞跳落去維多利亞港,游去獅子山搵真愛。佢一面靜靜雞咁游,一面又靜雞雞望下有冇人偷拍佢。問題係靜靜雞靜啲,定靜雞雞靜啲?

呢度係討論狀語靜靜雞同靜雞雞,喺程度上嘅分別。我即場問觀眾,主要針對小朋友,靜雞雞靜啲,定靜靜雞靜啲?又問下邊句多雞,多雞會唔會冇咁靜……大家互動起嚟,個場就咁炒熱咗。 

粵語互動元素:阿媽都唔認得

冇粵語互動:小公主開始有啲淚光,之後越喊越傷心。

有粵語互動:小公主開始有啲淚光,之後越喊越傷心,喊到阿媽都唔認得。

問題係乜野叫做喊到阿媽都唔認得?到底係你認唔到阿媽,定阿媽認唔到你?

呢度討論補語:阿媽都唔認得,有趣嘅地方係阿媽可以理解做主語同賓語都得。咁樣就有個討論空間。

粵語互動元素:語音與樂師

冇粵語互動:王子嘅隨從亨利見到佢哋咁幸 福,因為太開心喇,連啲鎖都爆埋。

有粵語互動:王子嘅隨從亨利見到佢哋咁幸福,因為太開心喇,連啲鎖都爆埋。你估吓爆鎖應該係:piklikpaaklaak,定pinglingpaanglaang?樂師可唔可以示範一下?好先嚟:piklikpaaklaak(樂師奏),跟住pinglingpaanglaang(樂師奏)。應該邊個?

因為piklikpaaklaak每個音節都係入聲做尾音,所以樂師奏出嚟嘅旋律要短促;而pinglingpaanglaang嘅尾音係非入聲,奏出嚟嘅旋律要悠長。呢個係第一個互動,同樂師嘅互動。第二個就問觀眾邊個旋律配合邊個語音,睇下小朋友識唔識短促同悠長嘅概念。

整個節目有成九十分鐘,上面只係其中幾個例子,用粵語有趣嘅概念串連傳統嘅童話,同觀眾、樂師一齊互動,形成立體嘅連繫,令大家有個難忘而獨特嘅交響樂欣賞。

(作者為藝人、香港中文大學中國語言及文學系前高級講師。)