語文.書話
2022-12-30
二〇二三年一月號
劍擊語言一擊即中

助教Jacky(註)鍾意玩劍擊,有日佢話有啲劍擊術語好有趣,問我可唔可以同佢寫篇文章介紹畀讀者,佢咁主動當然歡迎,而且係應該,因為玩劍擊都係一樣主動性、機動性好高嘅體育運動。

唔講唔知,劍擊(Fencing)嘅官方語言其實係法文,所以我哋成日喺電視度睇劍擊比賽時會聽到裁判講法文,例如:每一劍開始之前,裁判會話:En grade,Prêts, Allez,對應嘅意思係:就位;準備好;開始。喺香港同台灣我哋會翻譯做「劍擊」,不過喺大陸,通常會叫呢樣運動做擊劍,兩地唔同叫法,個情況就好似「質素/素質」、「宵夜/夜宵」等。其實唔單止呢樣運動名稱嘅叫法有分別,裏面仲有好多術語都有唔同嘅叫法。

「工欲善其事,必先利其器」,劍擊器材絕對係劍擊運動嘅重中之重。想購買器材時,可以去劍會或者劍校,亦都可以自己上網訂購。喺網上搜索劍擊器材時,好自然就會發現叫法上嘅分別。例如:「龜」,你可能會好奇龜呢種動物同劍擊有啲咩關係,其實龜就係電纜盒,個盒將啲電線連接住電子計分器同埋運動員嘅電衣。用龜字就係比喻電纜盒嘅形狀同龜殼相似。

又例如頭先提到嘅「電衣」,喺大陸會叫做「金屬衣」。同樣地,好多劍擊用品嘅叫法都有唔同,例如用嚟裝器材嘅袋,我哋會叫「劍袋」,就好似手袋咁,我哋會用個「袋」字,都係用第二聲發/doi2/;而普通話叫法會用個「包」字,手袋會叫做「包包」,「劍袋」就會叫做「劍包」。

喺授課語言方面,好多時教練都會用返廣東話嚟教劍擊,有啲常見話語亦都值得我哋探討。劍擊堂有分「個人課」同「集體課」,「個人課」嘅意思係教練一對一指導學員,而「集體課」就會係教練同助教去教導一班嘅學員。例如:教練會話「我一陣畀課你」,「畀」即係「給」嘅意思,即係一陣會教學生「個人堂」,呢個課字,唔係人數隨意嘅課堂,而係指個人課堂。當教練話「畀課」,咁學生又會點講呢?一個「畀」,另一個就自然「攞」,所以學生會話「攞課」,而「課」同樣都係指「個人課」。例如:小明今日會同教練攞課。順帶一提,如果冇任何語境,單從語音上理解,「攞課」好容易聽成「攞貨」,即係取貨嘅意思。

而喺我哋上「集體課」嘅時候,會有練習時間,會著齊裝備,連接晒所有電線,同其他學員好似打比賽咁計分練習。教練畀指示嘅時候,會話:大家而家可以去「著衫上電」,言下之意即係叫大家準備實戰練習。

宏觀啲睇,上面涉及劍擊嘅術語,係行內人為方便溝通而產生嘅用語,多數都係口語;而劍擊嘅專業用語,例如:佩劍、花劍、重劍,內含專業嘅知識或特定嘅概念,所以一項運動可以細分:術語同專業用語。

註:郭卓祺(Jacky)為香港大學中文及經濟雙主修三年級學生,現為Ben Sir’s Academy助教。

(作者為藝人、香港中文大學中國語言及文學系前高級講師。)