Wallace：

「寫詩於你唔重要，寫詩於我好必要，唔寫唔得。中國作家高曉松講過：『生活不只是眼前的苟且，還有詩和遠方。』作為醫學生，面對幾千頁嘅教材、醫生同病人嘅期望、同埋對自己嘅懷疑，好多情感無以名狀，假如要寫散文，有心無力；寫小說，無心無力；唯獨寫詩，唔太花心力而超世脫俗。醫學生本來就冇好充裕嘅時間寫好多嘢，但求有一個好凝煉，限制少，可以跳躍咁去抒情嘅方法。詩於是就包容到呢個又感性又忙碌嘅我。例如：我早前喺《別字》網刊刊登嘅作品〈遺詩〉，當中嘅詩句：「或許我早就該弄清悲傷／和砒霜的讀音，收音機和鸚鵡／都被這兩個詞語噎住」係提醒緊自己，悲傷都唔一定要了此殘生。呢啲句子唔係日常寫作語言會用嘅，用個讀音將兩個詞聯繫，另外再補上兩個與聲音相關嘅意象就已經可以組成幾行詩句，確實對於醫學生嚟講好方便，結構同埋句與句之間嘅聯結唔使好緊密，慳水慳力，又有一種跳脫嘅感覺。呢啲句子用散文、小說或者任何其他形式都唔太適合，所以我話詩係唔寫唔得嘅。」

Ben Sir：

「新詩分享嗰晚我有啲觀察：一、人數唔算太多，但中場離座率極低；二、小朋友（小學生加中學生）人數多過以往，起碼多過『中文溝英文』、『廣東話溝普通話』；三、家長嘅問題有深度，例如：粗口可唔可以用嚟寫新詩？習慣咗寫詩會唔會影響口語上嘅溝通技巧？舊體詩演化成新詩原因係咪有啲功能舊體詩做唔到？等等；四、最有趣係一條點樣升學考醫科嘅問題，家長都冇問，顯示家長關心子女考試學業以外嘅東西。似乎詩歌或者新詩觸動到觀眾嘅心坎而令佢哋留低。

「Wallace一邊講，我一邊諗：『新詩嘅定義可唔可以科學啲呢？』我當然知道文學界對新詩有好多定義，但滿足唔到我；可能係新詩嘅呼召，令我從排他法嘅角度去思考問題：如果一堆文字唔屬於：散文、議論文、小說、劇本、歌詞、說明書、報告等，咁嗰堆文字好大機會係新詩。雖然冇辦法從正面角度好科學咁定義新詩；但反面嘅排他法就好科學咁界定新詩唔係乜，唔係物。繼續用排他法去思考新詩，冇錯，新詩唔使考試，新詩亦唔會幫你搵到工作，唔會幫你養妻活兒；簡單嚟講，新詩對生理自己（physical self）毫無幫助，將新詩排除得咁乾乾淨淨，淨翻落嚟嘅作用就係對心理自己（mental self）有幫助。身體歸身體，心靈歸心靈；胃痛還需胃藥醫，心病還需新詩醫，點樣醫，下一期繼續有詩家醫學生：Wallace。」

註：Wallace：唐華量，詩人，香港中文大學六年級醫學生，Ben Sir's Academy助教。