語文.書話
2025-1-27
二〇二五年二月號
老best、bestie有咩分別? (歐陽偉豪)

呢排沉迷玩「脆」,即係玩Threads,同中學生有以下一段嘅對答:

中學生:我老best會幫我喺sports day影各種藝術照,你哋老best會嗎?

我:老best這叫法大概什麼時候出現?跟bestie有什麼分別?

中學生:阿Ben您保佑我中文5**我就同你講。

我:你係第一個叫阿Ben叫得咁平起平坐喎。

中學生:我哋都係老Best來架嘛阿Ben。

我:多謝你呀bestie。

當然我好感謝呢位中學生同我吹水,亦好感謝佢當我係佢老best,呢次唔係我第一次聽老best,第一次聽嘅時候,我呆咗,因為嗰時我先啱啱學識bestie,而家又走一個老best出嚟,到底老best、bestie有咩分別呢?

喺另一個串文,我同樣嘅問題問過另一個中學生,佢話冇分別,都係一個名嚟;但我觸覺話畀我聽係有分別,雖然意思上都係解好朋友、死黨,或者老死,但從性別上考慮,bestie應該大概或者(用咁多呢啲副詞代表我唔太肯定)用喺女性身上,即係女性稱呼女性時用,好難想像兩個男仔,阿強、阿堅,二人互相稱對方係自己個bestie。

呢個男女之別可以喺bestie嘅構詞睇得出,bestie由best+ie,呢個-ie詞尾,就係英文常見嘅小稱詞尾(diminutive),例如:birdie、sweetie等,既然係小稱,表示細小,所以比較容易用喺女性身上,而用喺大男孩身上則較為尷尬。

睇翻老best,要注意呢個best係冇-ie詞尾,所以唔好寫成老bestie,到時你會尷尬到冇朋友,連老best都走埋。Best冇咗詞尾,多咗個詞頭老字,而呢個老作為詞頭,我哋有:老師、老虎等。老作為詞頭,係一個虛詞,同實詞嘅老係兩個概念,實詞嘅老,即係年紀大,例如:老人家;但老師個老並唔係老,好後生都可以做老師;老虎個老亦唔係解老,因為啱啱出世嘅都係叫老虎。

老best個老當然唔係指年紀老邁咁解,而係指認識好耐,或者好熟落,例如:老馮、老陳等,所以老字咁樣用法已經係弱化到變成一個虛詞,而唔係指年紀大嗰個實詞嘅老字。老字作為詞頭仲有:老點(成日點我,整蠱我)、老翻(翻版影碟)、老臨(臨時演員)。老best整個詞組,老字係虛詞,best又冇小稱詞尾,整個組合好中性,可以用喺男—男稱呼、女—女稱呼,同男—女稱呼。

順帶一提,睇翻文初嗰段對話,中學生用阿Ben稱呼我,而我話係平起平坐嘅用法,因為「阿+人名」組合係比較熟落,起碼已經係認識咗;中學生咁樣叫我呢個長輩當然係有一啲幽默嘅成份,同埋網絡世界,大家又真係平起平坐,唔使咁拘謹;但同阿Ben比較,老Ben熟落啲定阿Ben熟落啲?應該係老Ben熟落啲,而呢個老字,我感覺真係指年紀較大。

稱呼、稱謂係社會語言學重要嘅課題,我哋嘅語言好地地點樣出現老best呢個中英混合嘅用法,好值得大家研究落去。