Kenneth身為醫科四年級學生，功課繁忙，竟然考咗個「精神健康急救」證書，佢特別鍾意急救裏面呢三個概念，即：認清、容許、接受，大家睇睇佢點樣做詞語解釋。

Kenneth：

呼應返Ben Sir嘅精神雪櫃，入邊好強調一個人要有自己嘅精神食糧，就好似一個真嘅雪櫃咁，喺有需要嘅時候已經準備好，可以隨時使用。現今都市其中一個最常見嘅精神健康疾病—抑鬱症，患者通常首先對身邊事物都失去興趣。繼續用返個比喻嚟講，就係去到一個狀態，即使你有精神食糧都失去咗胃口去食嘢。要避免事情惡化到呢個狀態，大家都需要更加有意識地觀察自己嘅精神狀況，例如：忙完一日搭車返屋企嘅時候，可以諗吓自己今日過成點呢？無論係覺得開心、滿足定係壓力好大，有啲嘢擔心緊，先唔好講到要點樣面對或者處理呢個情緒咁遠住先，絕大部分人連第一步都唔係成日做到—接受自己當刻嘅心情。

希望大家睇到呢度可以得到一個攞得走嘅信息，就係有情緒或者壓力時，要認清、容許同埋接受自己有呢啲情緒同壓力。譬如仲有兩個禮拜考試，近排開始一讀書就會有啲擔心，可能會專注唔到。第一樣嘢應該做嘅唔係直接同自己講，「冇事啦，我快啲溫多啲書好過」。咁樣就已經跳過咗認清、容許同埋接受嘅三步曲，直接跳咗去點樣嘗試令呢啲情緒消失。有事情令你經常去諗甚至令你擔心，呢啲絕對係精神健康不佳嘅一啲徵兆，好似你身體無啦啦心口痛或者發燒，你都唔會由得佢唔理咁樣。

相反，意識到自己經常會擔心同埋專注唔到係做到頭半步，其次係要同自己講：「我對於兩個禮拜後要考試，最近真係有啲壓力，可能係擔心溫唔切書」，咁樣同自己對話聽落好似好低能咁，但呢一步嘅重要性在於畀自己認清自己嘅情緒，更高層次就係增加對自己嘅了解。然後再同自己講就嚟考試有壓力係正常，我哋要做嘅唔係將佢埋喺心入邊嘅底層唔去諗佢，咁樣只會令呢種壓力變成房入邊嘅大笨象（elephant in the room），反而直接容許自己有壓力，然後再理性地諗一諗有咩實際可行嘅方法去舒緩呢種壓力，例如：改變自己溫習方法提升效率，溫習一段時間後去散步放鬆，之後再繼續溫習等等。

咁樣簡單一套心法，如果真係做到出嚟，其實你已經對自己精神狀態了解多咗，同埋主動接受自己多咗。

至於我自己，又做唔做得到呢？

註：Kenneth：岑旻晉，香港大學醫科四年級學 生、Ben Sir's Academy助教。

（作者為藝人、香港中文大學中國語言及文學系前高級講師。）