Kenneth： 

我相信唔少人都試過，當壓力、情緒來襲嘅時候，理性同冷靜往往係最難保持嘅，但正正就喺呢啲時刻，「認清、容許、接受」呢幾個步驟可以成為一個穩定自己嘅工具。 

上年某個學期臨近考試，我讀書嘅壓力去到一個頂點。唔單止要溫書，仲有一個臨床實習報告要交，而屋企亦都因為一啲家庭問題搞到氣氛非常緊張。嗰陣時，我日日返到屋企都覺得啲情緒壓住自己，夜晚瞓唔着，第二朝又要硬撐住精神返學。嗰種感覺就好似一個氣球，越吹越大，隨時會爆裂。 

有一日，返到屋企，即刻就畀家人數落，話我成日唔陪屋企人，又話我咁大個仔仲要人幫手做呢樣嗰樣。我聽完之後即刻大爆發，嗰刻嘅感覺就係，自己明知道唔應該咁樣，但又控制唔到自己，我不停諗：「點解我會咁？點解我控制唔到自己嘅情緒？」 

嗰晚，我終於靜落嚟，開始嘗試用返自己喺精神健康課程學到嘅技巧。首先，我問自己：「其實你而家係咪好嬲？」答案肯定係嘅，但嬲嘅背後，其實係因為壓力太大，自己覺得好孤單，因為冇人理解我嘅感受。當我認清咗自己嘅情緒，我話俾自己聽：「係呀，壓力咁大，會嬲係正常嘅，未必關家人事，可能係呢段時間有太多嘢要處理。」呢個步驟就係容許自己有呢個情緒，唔需要逼自己「冇事」，因為咁樣只會將情緒越埋越深。 

當我接受咗自己嘅情緒之後，我突然覺得心入面冇咁「困」住，反而有啲空間去理性諗下，究竟可以點樣解決呢個困局。最後，我決定同媽媽再好好傾一次，解釋自己最近壓力好大，唔係有意忽略屋企人。意想唔到嘅係，媽媽聽完之後竟然話：「其實我都知你辛苦，但我見你成日匿喺房間唔出嚟，唔知點關心你。」嗰一刻，我哋之間嘅緊張氣氛突然消失咗，換嚟一種理解同支持嘅感覺。 

當我哋見到身邊有人情緒低落或者壓力大，可以試下將呢三步曲同佢哋對話。 

第一步「認清」：「你最近點呀？係咪有啲嘢困擾住你？」 

第二步「容許」：「我明白你咁樣覺得係正常嘅，呢段時間你真係好辛苦。」 

最後「接受」：「咁你覺得有冇啲方法可以幫到你放鬆一下？」 

呢個技巧只係一個開始，最重要嘅係要有一個開放嘅態度，願意去關心自己同身邊人嘅精神狀態。當我哋做到呢一點，唔單止可以幫助自己減輕壓力，仲可以建立一個更互相理解嘅社會環境。希望大家喺忙碌嘅日子入面，記得花少少時間去了解自己，亦都唔好吝嗇畀身邊人一些關心。最終，善待自己、善待身邊人。 

註：Kenneth：岑旻晉，香港大學醫科四年級學生、Ben Sir's Academy助教。 

（作者為藝人、香港中文大學中國語言及文學系前高級講師。）