Dickson：

歐陽博士好重視跨學科發展，我亦係「溝」出嚟嘅跨學科產品—一個鍾意語言到「不務正業」，去minor讀中文嘅法律學院學生。早前好榮幸可以同Ben Sir一齊探討法律語言同日常語言嘅差別。得到語言學家指教，又怕講得太難，想深入淺出，所以當晚講座用咗問題切入，大家可以一齊諗吓，再睇答案！

一、律師同大律師，邊個大啲？

如果你覺得大律師大啲嘅話，恭喜你！你擁有正常人嘅語感！當晚八成觀眾都舉手投「大律師」一票—兩個都叫律師，但一個加咗個「大」嘅前綴，顧名思義梗係高級啲、犀利啲喇！

可惜，係錯嘅。事實上，大律師（Barrister）同事務律師（Solicitor）地位平等，各有分工，前者主力上庭訟辯，後者處理文書工作。睇到呢到可能你會諗：咁好地地做咩加個「大」字？原來，以往香港最高法院（Supreme Court）俗稱「大葛樓」：「大」係意譯Supreme，「葛」係音譯Court。大律師一般喺嗰度執業，久而久之就叫佢哋做大狀。

唔怕生壞命，最怕改錯名！香港律師會會刊《香港律師》就曾經刊出一篇〈正確的名字很重要〉，批評「大律師」呢個名稱具誤導性，甚至引嚟內地律師詢問「點樣先可以晉升做大律師」。根據我作為法律系學生嘅經驗，好多親朋戚友都會問類似問題，我亦解釋過兩者分別不下百次，語言真係可以影響大眾對法律嘅認知㗎！下次見到有人有呢個誤解，就畀呢篇文佢睇下啦！

二、「我要告到你坐監！」呢句說話有咩問題？

假設你被人偷銀包，你捉到個扒手嗰陣，好嬲咁鬧：「我實告到你坐監！」

日常語言理解，呢句說話似乎無咩問題，好明顯係「你」告緊佢啦！但喺法律上，你會見到好多判決書都寫住「香港特別行政區訴XXX」。原來特區政府（律政司）先係告緊人嘅控方，扒手係辯方。「你」作為受害者，好大機會要上庭作供，但都唔等於係你告人㗎！

「唔係喎，我見電視劇入面好多上庭告人，分身家，爭撫養權㗎！」嗰啲係民事案嚟嘅，的確可以由「你」告其他人，但一般嚟講係唔會告到人坐監。刑事訴訟嘅目的係令被告受法律制裁，例如監禁。因此，控方需要證明被告有罪，達到「毫無合理疑點」嘅程度。相反，民事訴訟好多時旨在獲得賠償，攞返應得權益，例如錢同物業。原告人嘅舉證要求只需要達到「可能性的權衡」：案件發生嘅可能性唔需要達到百分百，高過無發生嘅可能性就得。

未完，仲有下集講「不可抗力」！

註：張迪森（Dickson），香港大學法律學院四年級學生，Ben Sir's Academy助教。

（作者為藝人、香港中文大學中國語言及文學系前高級講師。）