新書主要整理我對「精神雪櫃」呢個概念嘅睇法之外，仲收錄埋呢兩年我喺精神健康推廣方面嘅經驗。全書分四章：

第一章：精神雪櫃嘅所謂理論

第二章：父母嘅精神雪櫃與親子溝通嘅關係

第三章：Ben Sir義診—個案分享

第四章：與大學生同行—跨學科分享

一切源於兩年前學童輕生事件，我未至於傷心，但總有啲揪心，我身為語言學博士，其實對大家嘅精神健康唔太上心，只係有興趣於當中嘅語言運用。

語言就係整個精神健康表述、論述嘅核心。

精神健康係個跨學科嘅領域，主要包括生理、心理、社會文化三方面，我唔係醫生，唔識講生理；我唔係心理學家，唔識講心理。我係香港教育局註冊教師，有三十年任教大、中、小學嘅經驗，近年考埋「精神健康急救證書」，可以講吓社會文化。

咁樣就界定咗新書嘅範圍：唔係講精神健康嘅診斷同治療，而係講精神健康嘅預防工作，即係點樣運用「精神雪櫃」提升抗壓能力，梳理親子之間嘅溝通關係，最後促進你、我、佢嘅精神健康。

既然精神健康涉及社會文化呢方面而我又聚焦喺推廣方面，咁就好順理成章用廣東話寫，反映精神雪櫃需要廣東話。

如果我身體有病痛，醫生唔需要識廣東話同我問症，只要佢識幫我割盲腸、通波仔就得。

但係如果我有精神、心理、情緒等問題，精神科醫生、心理學家、社工、輔導治療師等唔可以同我講英文，亦唔可以同我講普通話，只能夠同我講廣東話，因為我淨係識用廣東話嚟表達我嘅情緒，例如：

「我最近好唔開心，因為出書好辛苦，又驚冇人買，個心口翳住翳住，成日慌失失，疑神疑鬼，好似有把聲音叫我好自為之，醒醒定定，要睇路，唔係就會收我皮。」

雖然我喺大學有教過翻譯，但係形容自己嘅心理狀態，我唔識用外語，只能夠我口講我心，即係講廣東話。用廣東話嘅語調同修辭手法，從精神雪櫃呢個角度，去講出精神健康嘅推廣。

我懷疑廣東話唔單只係精神健康嘅表達形式，好可能係精神健康嘅內容，意思即係廣東話根本就係塑造咗我哋對精神健康嘅認知同睇法。呢點比較抽象，睇闊啲，意思即係語言塑造咗我哋對世界嘅認知。其實，呢點亦都好抽象……

點都好，最終極嘅問題就係：語言學喺精神健康佔據住乜嘢位置？扮演住乜嘢角色？

本書好唔好睇真係要睇過至知，但當中嘅推薦序我覺得係個彩蛋，因為絕大部份都唔係出自名人手筆，而係素人。點解要搵素人寫序，下次話你知。

（作者為藝人、香港中文大學中國語言及文學系前高級講師。）