入填詞行之後，同行家吹水，當然講下八卦嘢，又或者討論前輩歌詞。畢竟填詞呢行，當年師徒制不太多，唯一嘅老師，姓偷，偷師也，靚仔啲嘅名，叫參考。
其中一位大家參考最多嘅，應該係林振強（圖，明報資料室提供)，填詞人小克同我，吹咗近廿年水，都仲會拎林公歌詞出嚟討論研究，甚至搵返佢多年嘅文章，研究返佢創作背景，學術研究唔敢當，反而似起底組多啲。
林振強二○○三年尾仙遊，對於我哋遲入行者，無緣見面，而林公訪問又唔多，只可從佢廿年來字裏行間窺探，神秘感自然多兩滴。一個麻甩佬窺探另一個作古麻甩佬，呢單嘢本身都幾荒謬。
其中一樣得意嘅調查發現，（其實係有位前輩透露，何來發現？）林振強當年長期袋住一本秘笈，應該係攞嚟參考填詞用，呢本就係粵劇歌詞。
其實七八十年代，全部填詞人都熟讀粵劇，就好似盧國沾、鄭國江、黃霑、黎彼得，通通都飲過粵劇奶水，再變招絕世歌詞。林振強就得意在，中學喺慈幼讀書，六十年代夾band，之後去咗美國讀電腦，回港後做銀行電腦部，再轉廣告行業，即係佢支筆同時間溝埋西洋奶粉，仲有混合大量歐西流行曲，全部嘢撞埋一齊就變成佢嘅怪奇歌詞作品。
實驗場
最大嘅實驗場就係林子祥，一九八四年有兩首經典，先講比較出名嘅叫《愛到發燒》，一般嘅情歌唔會用病嚟形容，「發燒友」亦都係形容當年玩音響嘅人，將兩樣加埋，配合跳脫曲式，當年全港轟動，未夠，佢仲有兩句「頭暈去看醫生，醫生在食蕉」做全曲記憶點，鍾意嘅就大呼過癮，衛道者則不禁皺眉，須知道「吔蕉」當年乃含隱喻之市井粗話，「食蕉」對佢哋嚟講都係一種衝擊。今日睇返，當然冇乜事。
林子祥另外一首叫《丫烏婆》，內容一反傳統，叫你放棄靚嘅女仔，同個醜樣嘅一齊，原因喺歌詞講晒（請自行搜尋），內容講到似層層，但又暗合莊子「無用之用，是為大用」，歌詞貌似瘋癲，裏面暗藏道家哲學，妙哉。
林振強另一個更癲嘅實驗場係梅艷芳，一九八五年一首《壞女孩》，幫梅姐塑造全新形象（一九八二至八四年嘅歌其實好正路），歌詞其中一句「引致淑女暗裏也想變壞」，再一次嚇親保守派，香港有電台更加曾經禁播……家下睇返，有乜嘢咁露骨？反而流行文化，係越禁越紅，一年之後林振強再整多首《妖女》，講妖女懲罰壞男人，香港流行樂壇，之前冇人咁寫過，之後亦都唔多。無他，唱片公司，始終鍾意玉女、女神，到今日都係。
八十年代係林振強巔峰期，但其實填詞只係副業，佢正職係做廣告公司創作總監，喺佢文章曾經透露，度廣告好易，反而廣告公司人事太煩，為此亦曾經試過唔肯返工，創作度橋一日食兩包煙乃閒事。
三段式
寫歌詞，成為咗林振強暫時逃離現實嘅救生艇，因為自己話晒事，亦都同時應用創作廣告Storyboard嘅技能，放咗入歌詞入面，最經典一首係《三人行》（詩詩、劉天蘭、林子祥合唱，一九八一年），由第一段小朋友，第二段少年，末段成年，一氣呵成變成完整故事，此乃「三段式寫法」，如果一首歌有三段主歌（verse），就可以用此方法，增遞式敘事（現代講法叫一條龍），會令首歌故事性強，容易入腦，問鼎金曲。
另一首三段式經典，亦都係屬於林子祥嘅《追憶》（一九八四），故事亦分為三段：兒時和爸爸看藝人耍把戲、少年時首次和爸爸喝酒、成年後父親逝世主角獨自喝酒，成個故事結構完整，歌詞已經係MV，甚至已經係一個廣告：賣手表、相機、酒類皆可。
做自己
不停研究林振強作品，發現可以將物件同片段變成故事，加入適當比喻，甚至失驚無神天馬行空，就變成完美歌詞。而佢用字直接唔兜圈，就好似佢創作當年經典廣告佐丹奴句口號：「唔扮嘢，做自己」，以及《壹週刊》「不扮高深，只求傳真」，除咗講緊品牌之外，其實都係佢自己嘅寫照。
除此之外，一九九四年林振強為Beyond寫咗首《醒你》，講當年瘋狂Fans文化，其中有幾句：「我沒人迷／只想給各位／一些心裏感覺／不改編複製／／懶扮純情／要說實情形／不懂演馬騮戲／不包裝堆砌」，其實都似係林振強自白。
研究歌詞，除咗手法、用字、技巧之外，其實好多時，好似電影《食神》一樣，係講個「心」字，呢樣嘢只能意會，亦冇得扮，小弟勉強偷師，自覺東施，潑出水晶膠加雙氧水，自己食完，心裏知味。林振強至今始終自成一家，影響廣東歌極深，有心學填詞者，不妨嘗試偷師，方知其妙處。
（作者為香港填詞人。）