三十年廣東

到今日，又係一街六四分界頭、闊腳水桶褲、金絲眼鏡，最重要係，Disco播返當年廣東流行（Cantopop），即使今日膝下無兒，我心入面又咁講：依家興緊嘅嘢，我卅年前玩過。

廣東流行曲派對，當然播返當年金曲，但係播放嘅地點，唔止香港，家下連台北、曼徹斯特同加拿大都有。股票交易市場有分紐倫港，而Cantopop party亦都分布喺呢三個時區。

古語有三十年河東，今有三十年廣東。廣東流行曲已經有一套系統，有自己一陣味，尤其係八十到九十年代，經濟起飛，歌曲吸盡歐西日本流行精華奶水，歌詞內容更加「百花齊放」……（呢四個字，真係極之老套，但又好配合嗰個年代，我姑且就皺住眉頭放落去），總之就好玩盡興，當年樂壇，本身已經係一個party。

今日Cantopop disco，歌曲由八十年代到二千年都有，上世紀嚟講，必有以下單位：八十年代有林子祥、張國榮，梅艷芳、譚詠麟、達明一派、林憶蓮、張立基，九十年代則有四大天王、草蜢、杜德偉、軟硬天師、鄭伊健等等。

至於歌曲類型，當年有好多改編歌，尤其係日文歌，主要都係Dance Pop，即係力量型快歌，要將日文變成廣東歌詞，係有啲難度嘅。

喉滑、耳順、眾合

填快歌，一首大約四分鐘，貌似輕易，但順暢極難。由於拍子快，一秒有四至六個字（甚至快到一秒唱八個字都有，例如林子祥親自填詞的《阿Lam日記》）。填快歌要達到有三個原則：歌手唱得到、聽眾聽得清楚、聽眾可以跟埋唱。簡稱：喉滑、耳順、眾合。

歌手唱得到（喉滑）：首先唔好填到好似「入實驗室撳緊急掣」咁蹺口，最低消費係順口押韻，甚至要韻中韻（雙韻， double rhyme），歌手先至舒服唔會甩beat，需知道佢哋喺演唱會仲要跳埋舞甚至同觀眾握手，所以唔順口乃死罪。如果你達唔到呢個標準，歌手同監製錄音嘅時候，就已經會投訴，禮貌地（心入面有冇粗口唔知）即時問填詞人可唔可以改一改。資深嘅填詞人，當然唔會犯呢個錯。

耳順者，觀眾聽得清楚：用詞唔好太深，最好有啲成語諺語，同時鬼馬更好。例子有張國榮《無心睡眠》，填詞林敏驄：

張開口似救生圈

實驗雨的酸與甜

羅文《激光中》，填詞林振強：

光加熱就等於火

火加歌就等於我

若我與歌再加上你

溫度將提高更多

寫快歌，林敏驄與林振強乃詞界截拳高手，佳句極多，用字快狠準，直入心臟。

去到最後一關，眾合（聽眾都唱到）之道，副歌乃關節眼，字眼重複絕對冇問題，最好有疊字，標準係連小朋友都唱到，例子有達明一派《迷惘夜車》，填詞陳少琪：

我亂碰亂碰亂碰亂碰亂碰卻一空

（我成日覺得呢句係打麻雀做對對糊諗出嚟。）

譚詠麟《愛情陷阱》，填詞潘源良：

這陷阱　這陷阱　這陷阱

偏我遇上

（電影《秋天的童話》周潤發有引用過。）

梅艷芳《冰山大火》，填詞林振強：

跳跳跳跳　熱到要跳舞

快快　快快　快快　快快　快快　快快

快叫火燭車

火速的到步

（應該係廣東歌詞重複得最多嘅一次，連續十三個快字。）

所以，當年填快歌，最好諗咗副歌先，因為呢個關節位，而副歌好多時候都係歌名來源，先諗到副歌同歌名，成首歌嘅結構就容易建立。寫歌詞，其實好似玩數獨或者填字遊戲，搵到一個線頭，就可以順藤摸瓜，先見一斑，再窺全豹。

今日Cantopop party到處盛行，世界唔同地方又竟然播緊同一堆歌，新一代人又聽返跳返上一代嘅歌，考古可以變潮流，歷史原來又重複，黑膠淘汰回魂，三代歌曲翻身，所以最緊要鬥長命，如果有過百歲命，絕對可以睇到輪流轉，好多重轉。

（作者為香港填詞人。）