通常會咁樣做嘅，只有音樂監製。佢哋一收到份歌詞，遇到有字唔清楚點讀，最快方法梗係直接問填詞人，等於你公司電腦有乜頭暈身㷫，第一時間係打IT熱線。

「彼岸」個「彼」

更好笑嘅係，試過有監製朋友，錄緊歌詞嘅時候，而嗰一首歌唔係我寫，都send message嚟問我。原來佢哋錄緊嗰首歌，係翻唱上世紀嘅經典，填詞人已經搵唔到，所以搵個後輩嚟問，又幾合理喎。而佢哋嘅問題係：「彼岸」個「彼」字，應該讀「鄙」音，還是「比」音？

我第一反應係：兩個音都聽過有人讀，應該係一字雙音啩？然後火速上網求證（香港中文大學粵語審音配詞字庫），答案係：bei2（比音），冇其他。之後監製又引述歌手話：以前聽過人唱「鄙」音，應該唔會錯啩？

被佢拋一拋我，又好似係喎。九十年代王菲有隻《知己知彼》，林夕填詞，佢好似真係唱「鄙」音，但我返睇網上幾個唔同版本，佢都係唱「比」音。人類記憶真係唔可靠，所以有「曼德拉效應」，而曼德拉個樣，永遠同Morgan Freeman撈亂。

「閃爍」個「爍」

學粵語讀音，來源得三個：學校老師教、由細聽到大（即係自古以來）、字典查證。老師教，未必一定啱；聽人哋「自古以來」講嘅，錯嘅機會更大；最權威嘅只有係字典。如果字典都錯嘅，可以直接喺圖書館下架，書展永遠禁售。

四十年前有個類似懸案，發生喺譚詠麟《霧之戀》（林敏驄填詞）入面：「海邊一顆閃星星　或睡或現閃爍不停」。「閃爍」，八十年代，係讀「閃溺」，我記得小學老師都係咁教。但係到咗九十年代以後，學校同坊間又話應該讀「閃削」，仲話「閃溺」係錯。點啊？十年前後，啱又會變成錯？有冇咁難捉摸？

最後當然鬧上「終審庭」：即係網上字庫，哦原來「閃削」係正讀，「閃溺」係異讀，兩個都啱，打和啦Super。未完，原來仲有一個讀音，當你用「爆爍」呢個詞語，就要讀「爆洛」。死未？

粵語就係咁好玩，亦係咁麻煩，呢啲中古漢語，由秦朝開始，分六個朝代傳入南粵，所以同一個字，好多時候有輕微差異，仲有地域之差，好似廣州、澳門同香港，講嘅廣府話，都有少少唔同。

喺詞語音韻意境上，個人認為，「閃溺」個音，比「閃削」更有畫面，發音更加配合歌曲，又好唱。但近三十年，推「閃削」為正音，坊間好似冇乜歌用呢兩個字，填詞人又少粒子彈用。

「憧憬」個「憧」

另一個詞語，係「憧憬」，正音係「衝警」，之但係八十年代，我係聽開人讀「童景」，當年張學友有一首《沉默的眼睛》（陳少琪填詞）：「相愛是難預定  留低回憶  憧憬」，就係用「童」音。於是我又查，結果只有「衝」音，冇「童」音。同「閃爍」情況一樣，「童景」其實係又好唱又好聽，奈何字典冇呢個音，唯有尊重判決，想用呢兩個音，唯有用「情景」代替，意思，當然有唔同啦。

有前輩填詞人講過，唱片監製錄音室，搵支酒容易，搵本字典真係難。然後我經過多年觀察，又真係冇乜邊個監製錄音室有本字典放喺當眼處，有乜嘢方便得過，即時搵填詞人對質？

有時填詞人事忙，錄音時間太趕，未必答得切，所以細心嘅詞人，為免錄音錄錯歌詞，會喺份歌詞嘅「不常見字」度加埋語音助讀，譬如句歌詞係「命運多舛」，就會喺後面加（舛：讀音喘，哮喘個喘），咁樣就萬無一失。

「不屑」的「屑」

曾經發生過嘅錯讀事件，係將「不屑一顧」嘅「屑」，讀咗做「不肖」嘅「肖」！個錄音仲要出埋街，呢個版本有時都會聽到，至於邊首歌？我就唔講喇，又或者賣個關子，搵篇文再講吓。

近年香港參考大陸音樂節目，對作曲人、填詞人、編曲人、監製，都會尊稱「老師」。對於後輩叫自己「老師」，曾經有一段時間唔係好慣，話晒我都冇教過你嘢，何來有資格受得起「老師」呢個專稱？但後來慢慢諗，大家成日打嚟問字問讀音，好似詢問處，又好似客戶服務，咁不如厚面皮接受「老師」呢個名銜。

我小學時都有成日問阿媽個字點讀，佢就會叫我自己試吓查字典。字典，有另一個稱號，就係「啞老師」。

（作者為香港填詞人。）