你諗到幾多首賀年歌？

首先，當自己係外行人，農曆新年即刻諗到邊幾首廣東歌？《財神到》、《歡樂年年》、《祝福你》、《迎春花》、《喜氣洋洋》……。我諗正常人都諗唔到十首以上，而呢個playlist，自我有記憶起嘅八十年代，到今時今日有AI、有機械人、上火星，都仲係呢個playlist。

你實會話，唓，任何節日都係得嗰幾首流行歌㗎啦，聖誕節一定係Last Christmas，然後就係Mariah Carey嗰首。之但係廣東歌壇，係每年都有歌手推出新嘅聖誕歌，譬如二○二五年就有Error嘅193（郭嘉駿）推出一首《你的名字我的聖詩》。而香港八十年代以來，幾乎每一位歌手或組合都有一首關於聖誕嘅流行曲，幾乎每一位填詞人都會填過相關嘅聖誕流行曲。原因好簡單，聖誕節可以好浪漫，又可以好孤獨，相戀甜死人又得，失戀單身慘死人又得，點樣寫都中。功能上，只要十一月尾派台，電台一定會同你播到Boxing Day，足足一個月，抵玩也。

至於賀年歌，又係另一個世界。過年，係屬於家庭嘅，由辦年貨、行年宵、買花、團年、開年、拜年、聚賭、睇賀歲片、睇周星馳、上頭炷香、拜車公、舞龍舞獅舞麒麟，全部係群體節目，節日氛圍同浪漫、孤獨完全沾不上邊，整個社會視覺染紅，財富迅速轉移（唔係賭錢就派利市），就算有感情問題，都會用買桃花或者攝太歲去解決，呢個社會現象其實都幾神怪，持續半個月之後，大家又會回復返正常，由群體活動，焦點去返個人感受。

其次，新年係屬於群體，目標單一，發達升職為先，然後健康快樂平安，小朋友一定快高長大，學業進步，單身嘅就快啲埋單，講嘅嘢，同啲沉悶長輩親戚、樓下看更恭喜你嘅內容一樣，如新春八股，得樂離苦。喺呢個情況之下，許冠傑一首《財神到》（一九七八年，許冠傑、黎彼得填詞）三分半鐘已經講晒，四十八年來，呢首歌從來無對手，有廣東話嘅地方就有佢，版稅，更加唔使講，呢首歌本身已經係創作人嘅財神。（另，Wham嘅經典Last Christmas，仲細佢六年，一九八四年先面世）

《財神到》破格 《祝福你》妙哉

《財神到》其實都算係破格，用字活潑調皮，因為之前嘅賀年歌，都係比較正路，就好似一九七七年鄭少秋同汪明荃出咗賀年概念大碟《歡樂年年》，裏面有十二首賀年歌，其中兩首到今日繼續流行，就係《迎春花》（曲詞：關聖佑）同《歡樂年年》（曲詞：關聖佑、江南）。

黃霑亦都係新年活躍分子，一九八○年甄妮有首《祝福你》，就係佢作詞，顧嘉煇作曲，其中四句歌詞佢將四季嵌入：「春風為你吹開滿山花　秋月伴你天空萬里飛　讓夏夜燦爛滲進美夢　冬天冰霜不至」，頭三句畫面，第四句係祝福，冬天竟然唔凍，妙哉妙哉，全球暖化俾佢講中。此外，佢仲寫過首《恭喜你》，不過係國語，由蓓蕾主唱（一九七一年）。霑叔似乎係賀年聖手，一九九三年仲幫吳君如，填咗首《恭喜發財利是來》，當年電台都有熱播。

講開農曆新年，點可以唔睇賀歲片？一九八五年電影《恭喜發財》，譚詠麟有首同名主題曲，黃百鳴填詞。一九九三年有套《花田囍事》，許冠英有首《喜事齊來》，又係黃百鳴填詞。但係大家反而記得佢喺《家有囍事》，同各位巨星合唱《相逢何必曾相識》。

千禧後的賀年歌

講極，都係上世紀嘅賀年歌，究竟千禧後有乜？二○○二年，賀歲電影《嚦咕嚦咕新年財》，片尾曲有劉德華嘅《大勝無限番》，林夕填詞，冇提及新年，但係講打牌哲學，其中有句「男兒當食南」堪稱一絕，我當埋佢係賀歲歌。同一年，Twins出咗一首《你最紅》，黃偉文填詞，詞風時代感強，擺脫賀年歌娘味，算係Gen Z版嘅《財神到》，其中詞眼「旺淡市都這樣紅」，任何時候都啱聽，絕句。

其實Twins都係當年橫掃賀年歌嘅組合，佢哋仲出咗《孖寶668》（二○○二年的串燒賀年歌）、《四喜臨門喜迎春》（二○○四年，與BOYZ合唱，林夕填詞》、《八星報喜賀賀喜》（二○○五年，群星，蔡妙雪填詞）、《夢想黃金屋》（二○○六年，林夕填詞）、《紅噹噹飛吻》（二○○七年，草蜢合唱，夏至填詞）、《送豬型鼠》（二○○八年，陳少琪填詞），你未必聽過晒，但起碼以量取勝。

至於小弟，啱啱入行迷途小書僮，喺二○○八年，幫電視台改編咗張敬軒嘅《酷愛》，變成《酷拜》，YouTube竟然仲有，音質麻麻，有興趣讀者自己搜尋，當禮物。新年，志在攞個意頭，祝大家明月長照，馬到功成。

（作者為香港填詞人。）