金像獎第一屆係一九八二年，最佳原創電影歌曲（編按：當時叫最佳主題曲，之後都改過幾個名）喺第二屆先首次頒發，到今年為止，一共有二百一十二首歌曲入圍，身為行家，有部分真係未聽過。

為電影填詞挑戰更大

八十年代好興青春歌舞片，再加上眾多偶像崛起，所以一套戲，隨時有三四首電影歌曲，呢個情況係近年電影比較少見。經典電影天若有情（一九九○），已經有三首Beyond（《灰色軌跡》，劉卓輝填詞；《未曾後悔》，黃家強填詞；《是錯也再不分》，黃貫中填詞），同一首袁鳳瑛（《天若有情》，李健達、李默填詞，入圍），配合返劉華嘔血飛電單車、爆玻璃攞婚紗再去教堂，劈友等等畫面，完全係當年經典之作。

另外，寫電影歌曲，好多時候填詞人係冇睇晒成套戲（因為剪接師未剪好），又或者太趕，甚至只係知道故事大綱同劇本，就要寫份詞出嚟，呢個時候，真係考功力，要想像電影畫面，加埋角色情緒，再濃縮二百字變成一首歌，限制當然比普通流行曲更多，挑戰更大。

每一年咁多套戲咁多首歌，要選五首出嚟入圍，已經難過皇上選妃，同打入世界盃四強一樣咁難，所以好多時都好似做十三么咁：叫到糊，已經當食咗。加上大會係業界投票，好多時得獎同入圍，未必同大眾預期一樣，有時會出乎意料。

經典歌曲連入圍資格都冇

你覺得好經典嘅電影歌曲，好多連入圍資格都冇，好似鄭伊健《友情歲月》（《古惑仔》主題曲，劉卓輝填詞）、張國榮、梅艷芳《緣份》（同名電影主題曲，盧國沾填詞），呂方嘅《別了秋天》（《秋天的童話》主題曲，俞琤、陳少琪填詞），係咪好刺激先？ 就好似食最高級日本料理，你除咗睇佢切乜嘢你食，仲要睇佢喺你面前，切走咗啲乜嘢好肉，然後掉咗佢，咁嘥？冇錯，貢品一樣。

基本上每一屆都可以寫一篇千字文，因為太精彩，以第一首得獎作品露雲娜為電影《俏皮女學生》唱嘅《戚眼眉》為例，填詞人林振強嘅詞鋒鬼馬，麻甩佬可以寫到女學生情懷，其中幾句：「上課批啤梨   暗暗一開四   一片遞給你」，真係聽到會心微笑，我等填詞人，呢句已經當係金球指標。廿幾年前寫Twins，到今日寫女團歌，依然係參考教材。

至於同年落選嘅歌曲，有許冠傑《最佳拍檔》（同名電影，許冠傑包曲詞），譚詠麟《小生怕怕》 （同名電影，黃百鳴填詞），譚詠麟《愛人女神》（同名電影，黎彼得填詞），雷安娜《彩雲曲》（同名電影，林敏驄填詞），首首都係金曲，八十年代人人識唱，落選佳麗，都已經咁精彩，當年真係爭崩頭。

唔係大歌星就一定攞硬

呢個獎項過癮之處，並唔係大歌星就一定攞硬，譚詠麟提名過四首、除咗上一段嗰兩首，仲有《幻影》（電影《陰陽錯》，林敏驄填詞），同《愛的根源》（電影《君子好逑》，林敏驄填詞），獲獎次數係零，但喺其他電台嘅音樂獎項，係橫掃。

張國榮提名五次，只係攞過一次，就係《金枝玉葉》嘅《追》，林夕填詞。落選嘅都唔簡單：《倩女幽魂》，同名電影，黃霑填詞；《紅顏白髮》，電影《白髮魔女傳》，林夕填詞 ；《有心人》（梅艷芳合唱），電影《金枝玉        葉2》，林夕填詞 ；《夜半歌聲》，同名電影，莫如昇填詞。

梅艷芳算係命中率最高，提名七首，三首得獎：《胭脂扣》，同名電影，鄧景生填詞；《女人心》，電影《東方三俠》，林夕填詞；《似是故人來》， 電影《雙鐲》，林夕填詞。落選嘅有《莫問一生》，電影《東方三俠》，林夕填詞；《何日》，電影《何日君再來》， 黃霑填詞；《似水流年》，同名電影，鄭國江填詞，仲有前段提到嘅《有心人》。

呢個獎慘烈之處，係好多經典金曲，都好難過到呢一關，因為競爭實在太激烈，好似一次過推五隻馬王出賽，肉眼見到係同時間衝線，影完相都仲要技術分析，贏嘅只係馬鼻上一條馬毛。就好似二○○四年，電影《大隻佬》主題曲《身外情》，黃耀明主唱，林夕填詞，首歌講咗電影故事內容，又可以當情歌聽，入面更暗藏佛理因果、人生哲學，好似兜陳年滷水，越老越滋味。之但係嗰屆佢又輸咗畀《無間道II》嘅《長空》，Beyond唱（填詞黃家強、葉世榮），諸法果然無常，稱霸當然無倆。

所以呢個頒獎典禮係幾特別，冇乜路捉，有時又幾玄妙，冇嘢係贏硬，輸咗或者唔入圍又唔使失落，更加唔使問點解，不如學大隻佬和尚，樹下打坐，點一爐香，看破夢工場，電幻千萬相。

（作者為香港填詞人。）