呢兩個題目，要交功課好易，要寫得精彩好難，老竇老母，唔係返工就煮飯，除非你老竇係金正日，老母係英女皇，否則內容都應該千篇一律，做教師改過簿嘅一定知。呢樣嘢同廣東歌詞一樣，歷史以來寫爸爸媽媽嘅歌好多，但係留喺你心目中嘅有幾多首？

成長於上世紀八十年代嘅，一定係呢幾首：《父母恩》（許冠傑唱，許冠傑、黎彼得作詞，一九七八）、《念親恩》（陳百強唱，楊繼興作詞，一九八一）、《真的愛你》（Beyond樂隊唱，小美作詞，一九八九）。呢三首，直到而家，電台都係每年必播，就算你比首歌年輕，都一定聽過。

正如之前所講，寫隻歌俾父母真係有啲難度，始終都係華人世界，對父母之愛都係比較含蓄（尤其爸爸）。另一方面，好似小學生作文咁，要寫得感動之餘而不落俗套，係非常之難。古文可以參考嘅，頂多都係《二十四孝》、近代有朱自清嘅《背影》，再唔係極端啲玩《目連救母》。

《父母恩》文學根底強

另外當年歐西流行，都係講愛情或者世界大愛，佢哋文化冇「百行孝為先」呢樣嘢，流行曲嘅地盤，又好似同讚頌父母親格格不入，你想講都得，就係搣唔甩一浸古典味。《父母恩》嘅出現，都係偏向小調古典，黎彼得、許冠傑兩人用詞含蓄，怕怕醜醜咁，成首歌一個「愛」字都冇出現過。其中兩句「春暉寸草心　推衾送暖舐犢情深」，更加借用古文，放喺副歌最重要嘅詞眼上面，盡顯功架。連孟郊嘅〈遊子吟〉「誰言寸草心　報得三春暉」都放埋入去；「老牛舐犢」，呢個典故都有一千七百年歷史；「推衾送暖」，取自《南史》典故「推襟送抱」，出自唐代，一首廣東歌可以寫成咁，足窺文學根底。

陳百強嘅《念親恩》，都係講自己離開咗父母，長夜漫漫望住月光，突然間諗起兩老，諗諗吓喊咗出嚟，然後點樣報親恩呢？「輕彈曲韻夢中送」就係答案。Danny嘅演繹代表咗孝順文青，又係一代經典，父母大壽必唱大熱。

《真的愛你》唱足四十年

當年樂壇短期內有兩首高質父母歌，應該已經飽和，好難超越。殊不知八十年代末，一隊原本留長頭髮嘅搖滾樂團 Beyond，剪短晒頭髮做乖仔，做咗首經典嘅《真的愛你》出嚟，小美填詞的角度新穎，講一班反叛青年掛住夾 band，明知阿媽唔鍾意都一意孤行：「沉醉於音階她不讚賞，母親的愛卻永未退讓」。有型自我得嚟，又吹你個衰仔唔脹，音樂仲要輕快，當年橫掃全港樂壇，Beyond 極速入屋，至今接近四十年，母親節都係播呢首，完美示範。

Beyond 行出呢一步，一方面名成利就，另一方面又得罪原本嘅地下搖滾樂迷，甚至被冠上「搖滾叛徒」之名。但之後 Beyond 嘅作品，糅合流行元素同搖滾風格，歌詞內容展現社會性同世界觀，著住皮褸玩結他，都可以多謝阿媽，音樂就係如此共融。之後一九九三年，佢哋再接再厲，寫咗首《爸爸媽媽》出嚟（黃家駒作曲，黃貫中填詞），直接借父母角色，講出當年中英港矛盾，依家聽返，歷久不衰。當然，父親節母親節，你唔會聽到呢首歌。

「另類父愛歌」《單車》

之後到九十年代，四大天王有郭富城《強》（林振強填詞），劉德華《媽媽的臉》（劉德華填詞），好正氣地多謝父母。尤其《強》，到而家好多活動都有唔同嘅改詞版本出現，城城外父都應該由細聽到大。

去到二○○○年之後，仲竟然有人挑戰父母親呢個題材，仲要突圍成功，就係陳奕迅嘅《單車》（黃偉文填詞），首歌冇直寫同父親嘅愛，反而係童年時父子有種疏離：「為何這麼偉大？如此感覺不到，不說一句的愛有多好？只有一次記得實在接觸到」等等，之前又真係冇人寫過，上代父子情其實就係咁，大家唔會有太多身體接觸，亦都唔會將愛字講出嚟，呢首可以叫做「另類父愛歌」。好奇怪，喺當年兒歌流行榜呢首歌係有獎嘅，不過小朋友可能要大個咗先至會明白真正意思。

再過幾年，尹光奇峰突出，整咗首《少理阿爸》出嚟（梁建邦填詞），今次係老竇鬧仔，借啲意講粗口諧音，首歌功能上根本就係比當年party場炸機用，搞笑得來又易入腦，當年大家都喺K房唱過唔少，到而家已經變成另類父親節經典。另外地下Hip Hop界嘅KZ，都有一首《容易受傷的女人》，講媽媽，故事角度刁鑽，我當教材嚟用，有興趣自己上 YouTube 聽下，講媽媽，原來可以好有型嘅。

掉轉頭寫歌俾仔女

近呢廿年又變咗，而家啲歌手係掉轉頭寫歌俾仔女，總之每個做老竇嘅歌手一定有：陳奕迅、陳柏宇、張繼聰……而最搞笑係，下一代已經讀緊國際學校，識唔識中文都未知，仲要係個個聽K-Pop同外國歌，不過都係一個年代嘅紀錄。

另一方面，近代歌手，都有人會專登出隻歌送俾媽媽爸爸，譬如小肥嘅《負親》（火火填詞）、陳健安嘅《梨子》（許弘毅填詞），後者借批生果講父愛，故事甚有朱自清〈背影〉橘子嘅味道。

總結嚟講，提到父母親嘅流行曲，好多都有遺憾，「樹欲靜」之類。既然都聽咗咁多，何不做一次孝順仔女，坐言起行，親口講句「多謝」同「愛」呢？

（作者為香港填詞人。）