當中有個夢　名叫做和平

一九九○年意大利世界盃，絕對係一個值得記錄嘅年份，當年西德攞冠軍，同年十月東西德合併，之後就變成今日德國隊，而南斯拉夫亦都係最後一次出現，之後分裂成七個國家，然後其中嘅克羅地亞同波斯尼亞，日後都成為強隊。而當年嘅世界盃主題曲，譚詠麟嘅《理想與和平》（林振強填詞，原曲都係意大利嘅世界盃主題曲），當中幾句「不必分西東　只知彼此眼睛　當中有個夢　名叫做和平」。明明係講緊足球奪標，林振強就係呢個動盪年代，將焦點放咗喺人類和平，仲要講明「不分疆土國界　共將漆黑戰勝」，都算前無古人，之後嘅世界盃主題曲都冇超越到。林振強本身亦都鍾意足球，當年喺佢嘅洋葱頭專欄有提到球王馬勒當拿，一九八六年帶領阿根廷奪冠之人，而佢嘅「上帝之手」，剛好四十年歷史。

同年亞洲電視都有轉播世界盃，亦創作咗一首比較搞笑嘅主題曲《勝出是時候》，曾志偉主唱，林敏驄填詞，改編自名曲Lambada，歌詞偏向輕鬆，唯獨去到中段：「奔走搏罰球　係咁亂扭冇得俾佢唞　波餅跌落頭　省親心口老抽都要走」，呢四句盡顯林敏驄腳法，相信佢都係極速完成份歌詞。

獻出激情　期望世上和平

去到一九九四年美國世界盃，當年香港興緊四大天王，但似乎四位都同足球冇乜關係，結果竟然係黎明跑出唱主題曲《獻出激情》（簡寧填詞），首歌好特別，係特別慢，唔知大家有冇留意，足球呢個題材，通常都係配快歌，節拍感強，副歌激昂，容易入腦先係正常。呢首就唔太特別，可能上一屆林振強填得太勁，呢首啲內容都有少少似：「願望是世間擁有和平　不分疆界　各方呼應」。其餘都係四平八穩，所以大家冇乜印象係正常。

同年，無綫又搵曾志偉、林敏驄做咗一首《搞事世界盃》，林敏驄填詞，喺電視成日播，不停重複「世界盃」，然後插返改咗詞嘅Seal with a Kiss，感覺不大。

起來　起來　起來　起來

除咗波係圓，歌都係玄。一九九八年法國世界盃，李克勤整咗首經典出嚟，就係《球迷奇遇記》（作曲江港生、李克勤，填詞李克勤），首歌一開始真係有一段馬賽進行曲，跟住副歌就不斷「起來」，呢首洗腦程度絕頂，當年成街嘅小朋友都識唱（今年都應該三十幾歲），副歌有精句：「場場場面偉大　腳腳腳法古怪　人人人浪最high」，巧妙連續三句三疊字，同首歌完美配搭。另外李克勤本身都係球迷，所以嗰段Rap，出現咗七位球星（碧咸、施丹、朗拿度、華達拉馬、伯金、巴治奧、卡路士），都算係為當年寫下紀錄。不得不提呢屆有一個經典場面，就係鏡頭無意中影到現場旁述林尚義食煙，然後李克勤打圓場：俾阿叔食埋少少嘢先。

實現願望用努力　實在做事用臂力

去到二○○二年日韓世界盃，大台繼續搵李克勤唱Victory（填詞陳少琪）做宣傳，呢首歌冇提到足球或者相關嘅嘢，由於曲太快，歌詞太密集，所以用咗「臂力、魄力、威力、努力……」，總之就好多力。

當年中國首次打入世界盃決賽，所以國際足協大中華區都整咗首歌叫《衝鋒陷陣》，黎明主唱，甄健強填詞，內容都係同足球冇乜關係，曲式有啲似《眼睛想旅行》，當年喺電台仲有上榜。

努力向前衝　像有金鐘罩　像有金剛炮

二○○六年德國世界盃，都仲係李克勤，佢出咗首《我著十號》，又係自己填詞，都係帶少少風趣，副歌有啲激昂（陳輝陽作曲），又出金鐘罩又出金剛炮，都係一首經典作品，可能唱咗三屆世界盃，內容其實都有些少重複，之後李克勤冇再出類似嘅歌。

其實同年仲有無綫同有線出世界盃主題曲，連英皇群星都玩埋一份，有一首《夢幻組合》（李峻一填詞），但都不太有代表性。至於近年幾屆，大家都似乎冇乜印象。其實，要做世界盃主題曲，真係有啲難度，首先歌曲一定要入腦，同時又要激情，填詞更加困難，好容易變老套，因為來來去去，都係成功爭取、不怕辛苦之類，格局大啲嘅，就去到和平同友愛，寫寫吓就好似學生填詞比賽嘅作品。當然，填詞人本身都要對足球熱愛，先至可以挑戰李克勤連續出三屆嘅紀錄。

（作者為香港填詞人。）